IV міжнародны кангрэс гісторыкаў Беларусі «Гістарычная навука Беларусі: асобы, канцэпцыі, дасягненні» прымеркаваны да 90-годдзя Інстытута гісторыі НАН і стартаваў сёння ў Мінску.У канферэнцыі прымаюць удзел прадстаўнікі акадэмічнай і вузаўскай навукі Беларусі і замежжа, грамадскія дзеячы. ГрДУ імя Янкі Купалы на кангрэсе прадстаўляюць рэктар універсітэта Ірына Кітурка, намеснік дэкана факультэта гісторыі, камунікацыі і турызму Віталь Белазаровіч, загадчык кафедры сучасных тэхналогій даўніверсітэцкай адукацыі Святлана Сілава, загадчык кафедры гісторыі Беларусі, археалогіі і сацыяльных гістарычных дысцыплін Сяргей Піваварчык.
Сярод удзельнікаў кангрэса - прафесар кафедры гісторыі Беларусі археалогіі і сацыяльных гістарычных дысцыплін Эдмунд Ярмусік, прафесар факультэта мастацтваў і дызайну Дзмітрый Караў, прафесар кафедры тылавога забеспячэння Уладзіслаў Крыўчыкаў, прафесар кафедры гісторыі Беларусі, археалогіі і сацыяльных гістарычных дысцыплін Святлана Марозава. Удзел у канферэнцыі таксама прымаюць дацэнт кафедры гісторыі Беларусі, археалогіі і сацыяльных гістарычных дысцыплін Аляксей Загідулін, дацэнт кафедры англійскай філалогіі Анастасія Дудзько, дацэнт кафедры журналістыкі Сяргей Марозаў і магістрант Марына Глаўдзель.
У рамках кангрэса будуць прэзентаваныя айчынныя даследаванні ў галіне археалогіі, гісторыі беларускай дзяржаўнасці. Тэмамі для разгляду стануць беларускія землі ў эпоху Сярэднявечча, Новага і Найноўшага часу. Вучоныя прадставяць сваё бачанне Беларусі ў войнах і ваенных канфліктах, а таксама найноўшыя даследаванні ў галіне сусветнай гісторыі.
Мерапрыемства аб'яднае гісторыкаў Беларусі. Плануецца прысутнасць прадстаўнікоў Расіі, Украіны, Літвы і Злучаных Штатаў Амерыкі. Акрамя таго, падчас другога дня кангрэса, 18 кастрычніка пройдзе круглы стол «Рэвалюцыя і дзяржаўнасць», прымеркаваны да 100-годдзя з дня нараджэння акадэміка НАН Беларусі Іларыёна Мяфодзьевіча Ігнаценка. Традыцыйна па матэрыялах кангрэса запланавана выданне зборніка. Кангрэс будзе доўжыцца два дні. Сёння, 17 кастрычніка, праходзіць пленарнае пасяджэнне. Секцыйныя пасяджэнні пройдуць 18 кастрычніка.
У тэму:
Інстытут гісторыі НАН Беларусі быў створаны 15 кастрычніка 1929 года на базе шэрагу кафедраў і да 1931 гады зваўся Інстытутам гістарычных навук. Сёння гэта не толькі вядучы цэнтр навуковых даследаванняў Беларусі ў галіне гісторыі, археалогіі і антрапалогіі, але і адзін з найстарэйшых навуковых інстытутаў Нацыянальнай акадэміі навук. Ён валодае ўстойлівымі міжнароднымі сувязямі з навуковымі цэнтрамі Расіі, Украіны, Польшчы, Літвы, Латвіі, Германіі, Францыі, Сербіі і іншых краін.