У рамках работы канферэнцыі ўдзельнікі разгледзяць псіхалагічнае здароўе і псіхалагічную культуру асобы, пазітыўны псіхічны стан асобы, прааналізуюць пазітыўныя фенамены зносін і міжасобасных узаемадзеяння, псіхадыягностыкі і інтэрвенцыі ў пазітыўнай псіхалогіі, абмяркуюць пазітыўную псіхалогію ў розных відах дзейнасці і сферах жыцця.

Удзельнікамі навуковага форуму 25 кастрычніка ў вочнай і завочнай форме стануць больш за 50 чалавек з чатырох краін - гэта навукоўцы, аспіранты, магістранты, студэнты, практычныя псіхолагі ўстаноў адукацыі і прадпрыемстваў. На канферэнцыі яны атрымаюць магчымасць апрабаваць вынікі сваёй навукова-даследчай дзейнасці, абмеркаваць перспектывы пабудовы далейшых даследаванняў.

Фармат канферэнцыі прадугледжвае працу ў рамках пленарнага пасяджэння, секцыйных дакладаў і круглага стала. Таксама плануецца правядзенне панэльнай дыскусіі, на якой дакладчыкі выкажуць сваю навуковую пазіцыю ў дачыненні да стану і перспектыў развіцця пазітыўнай псіхалогіі ў сучасным свеце.

Арганізатарамі канферэнцыі выступае факультэт псіхалогіі ГрДУ імя Янкі Купалы, суарганізатарамі - Інстытут псіхалогіі Расійскай акадэміі адукацыі (Расія), Яраслаўскі дзяржаўны педагагічны ўніверсітэт імя К.Д. Ушынскага (Расія), Мардоўскі дзяржаўны ўніверсітэт імя М.П. Агарова (Расія), Кастрамскі дзяржаўны ўніверсітэт імя Н.А Някрасава (Расія), Сумскі дзяржаўны педагагічны ўніверсітэт імя А.С. Макаранка (Украіна), Херсонскі дзяржаўны ўніверсітэт (Украіна) і Універсітэт у Беластоку (Польшча).

Праца канферэнцыі будзе ажыццяўляцца на працягу дня па адрасе: вул. Ажэшкі, 22. Рэгістрацыя ўдзельнікаў з 9.00.