Сённяшні абітурыент з высокім балам, які жадае вучыцца ў Гродзенскім дзяржаўным універсітэце імя Янкі Купалы, марыць стаць юрыстам або спецыялістам па міжкультурных камунікацыях, мытнікам ці лагістам, і, вядома ж, IT-спецыялістам.

Менавіта на гэтыя спецыяльнасці, якія дазваляюць атрымаць жаданую прафесію, у купалаўскім універсітэце самы высокі прахадны бал па трох сертыфікатах у 2019 годзе. У лідарах традыцыйна шэраг спецыяльнасцяў юрыдычнага факультэта. Сюды прыйшлі адны з самых моцных абітурыентаў. Бо юрыст-міжнароднік павінен ведаць прававую сферу не толькі сваёй дзяржавы, валодаць некалькімі замежнымі мовамі, а таксама валодаць выдатнымі здольнасцямі да вядзення перамоў. Ды і ў цэлым прафесія юрыста заўсёды была адной з самых папулярных, запатрабаваных і перспектыўных, паколькі паслугі юрыста неабходныя ў многіх сферах дзейнасці чалавека. Так, на "Міжнароднае права" па трох сертыфікатах паступілі абітурыенты з агульным балам 370 і вышэй, на спецыяльнасці "Правазнаўства" - 334 і вышэй, "Эканамічнае права" - 333 і вышэй.

Высокі бал таксама і на спецыяльнасць "Лінгвістычнае забеспячэнне міжкультурных камунікацый (знешнеэканамічныя сувязі)". Сюды свае дакументы прынеслі абітурыенты, якія маюць не менш за 335 балаў. У глабальным свеце вельмі запатрабавана валоданне некалькімі замежнымі мовамі, бо сучасны бізнес ужо немагчыма ўявіць без кантактаў з замежнымі партнёрамі.

Акрамя таго, высокія прахадныя балы па трох сертыфікатах склаліся на спецыяльнасцях "Мытная справа", "Транспартная лагістыка (аўтамабільны транспарт)", "Рамана-германская філалогія (нямецкая) (на базе нямецкага)", "Кіраванне інфармацыйнымі рэсурсамі".

Для абітурыентаў, якія паступаюць па двух сертыфікатах, 24 ліпеня завяршыліся ўступныя выпрабаванні ў ГрДУ імя Янкі Купалы. Вынікі залічэння на дзённую і завочную формы атрымання вышэйшай адукацыі за кошт сродкаў бюджэту стануць вядомыя 26 ліпеня.

Нагадваем, што падаць дакументы на платную форму навучання ў прыёмную камісію па адрасе вул. Леніна, 32 можна па 4 жніўня. Больш падрабязная інфармацыя пра ход  прыёмнай кампаніі-2019 тут.