У час форуму запланавана ўрачыстае адкрыццё гарадскіх вуліц, аснашчаных сістэмай разумнага святлодыёднага асвятлення. Ініцыятыва была рэалізавана па праекце «Беларусь: Падтрымка зялёнага горадабудаўніцтва ў малых і сярэдніх гарадах Беларусі» ( «Зялёныя гарады»), які фінансуецца Глабальным экалагічным фондам і рэалізуецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя.

Разумнае святло кіруецца сістэмамі кантролю асвятлення. Гэтыя сістэмы ўлічваюць наяўнасць людзей, транспарту, асветленасць і час сутак, каб уключаць і выключаць асвятленне, тым самым эканомячы электраэнергію і грошы. Укараненне новай сістэмы дасць магчымасць таксама скараціць выкіды парніковых газаў.

Рэспубліканскі экалагічны форум праводзіцца ў Беларусі з 2003 года. У розныя гады мерапрыемствы праводзіліся ў Оршы, Горках, Полацку, Браславе, Мядзелі, Рэчыцы, Гродна, Брэсце, Маладзечна, Бабруйску, Мазыры, Мінску, Віцебску. Яго мэта - аб'яднанне намаганняў вялікіх і малых беларускіх гарадоў у пошуку эфектыўных шляхоў далейшага ўстойлівага развіцця. Мерапрыемства дае магчымасць абмяняцца вопытам прадстаўнікам гарадоў, вышэйшай школы і навуковых колаў, прыватнага бізнесу, міжнародных арганізацый, грамадскасці. Да ўдзелу ў форуме запрошаны і прадстаўнікі прыродаахоўных органаў дзяржкіравання іншых краін.

Арганізатарам выступае Міністэрства прыродных рэсурсаў і аховы навакольнага асяроддзя пры садзейнічанні мясцовых выканаўчых і распарадчых органаў, міжнародных арганізацый і партнёраў.