Заснавальнікамі прадпрыемства «Інфармацыйныя тэхналогіі ў будаўніцтве» сталі супрацоўнікі і студэнты інжынерна-будаўнічага факультэта. Сёння дзейнасць фірмы - гэта вынік навуковых распрацовак купалаўцаў. Як адзначыў прарэктар па навуковай рабоце Юрый Раманоўскі, вельмі важна, што ў працу ўцягнутыя студэнты. Менавіта яны сталі ініцыятарамі праекта. Некаторыя з купалаўцаў ужо працуюць на прадпрыемстве і плануюць сюды размяркоўвацца.

Зараз распрацоўшчыкі канструююць страчаныя гістарычныя помнікі. Сярод нядаўніх распрацовак - макет Барыса-Глебскага манастыра, будынак якога быў разбураны. У ліку мадэляў і Фарны касцёл - адно з самых папулярных месцаў сярод турыстаў. Ажыццявіць візуалізацыю будынка дазваляюць архіўныя чарцяжы.

- Мы плануем рабіць візуалізацыю будынкаў і збудаванняў, а таксама рэканструкцыю гістарычных будынкаў і 3D-друк. З падобнай 3D-мадэлі мы можам атрымаць чарцяжы, планы, фасады будучых будынкаў, якія ў перспектыве можна раздрукаваць на 3D-прынтары. Кожны элемент - гэта маленькая 3D-мадэль, - адзначыў кіраўнік прадпрыемства, старшы выкладчык кафедры тэхнічнай механікі Эдуард Гнядэк.

Акрамя таго, тэхналогія дазваляе ствараць віртуальныя 3D-мадэлі новых будынкаў, напрыклад прыватных дамоў ці кватэр. У залежнасці ад складанасці будынка, адзін праект можа вырабляцца ад некалькіх гадзін да некалькіх тыдняў. Кожны элемент будынка робіцца ўручную.

Варта адзначыць, што ўкараненне 3D-тэхналогій у будаўніцтва і праектаванне - гэта сучасная тэндэнцыя, якая актыўна развіваецца ў Беларусі. Падобных прадпрыемстваў у Гродне няма. У будучыні вытворцы плануюць ствараць барэльефы з гістарычнымі месцамі Гродна і прасоўваць сваю прадукцыю сярод турыстаў, а таксама выйсці на міжнародны рынак.

Дарэчы, ідэя стварэння такога прадпрыемства, тады яшчэ на стадыі праекта, была прадстаўлена на конкурсе студэнцкіх start-up праектаў «ИнНаСтарт»  і заняла другое месца ў намінацыі  «Лепшы стартап-праект - ТЭХНАЛОГІЯ».