Як распавяла прафесар кафедры перакладу і міжкультурнай камунікацыі ГрДУ імя Янкі Купалы Людміла Рычкова, вывучаюць беларускую мову студэнты філалагічнага факультэта МДУ і ўдзельнікі Школы юнага філолага МДУ. У рамках заняткаў студэнты таксама паглыбляюць уласна мовазнаўчыя веды, вырашаючы лінгвістычныя задачы на ​​матэрыяле беларускай мовы. Заняткі для слухачоў праводзіць метадыст Цэнтра беларускай мовы, літаратуры і культуры, ураджэнка Беларусі, Вераніка Антанюк.

Цікавасць да беларускай мовы праяўляюць таксама аспіранты МДУ з Кітая, якія, ужо ў дастатковай ступені асвоіўшы рускую мову, хочуць вывучыць для параўнання блізкароднасную беларускую мову.

Нагадаем, што адкрыццё навукова-адукацыйнага «Цэнтра беларускай мовы, літаратуры і культуры» адбылося 12 снежня 2017 года на філалагічным факультэце МДУ імя М.В. Ламаносава. Цэнтр быў створаны з мэтай развіцця і ўмацавання навукова-адукацыйнага супрацоўніцтва паміж Расійскай Федэрацыяй і Рэспублікай Беларусь. З ініцыятывай стварэння сумеснага цэнтра выступіў Гродзенскі дзяржаўны ўніверсітэт імя Янкі Купалы. Праект падтрымаў рэктар МДУ акадэмік У.А. Садоўнічы.

Варта адзначыць, што Цэнтр пастаянна ўзаемадзейнічае з Пасольствам Рэспублікі Беларусь у Маскве, актыў Цэнтра наведвае заняткі беларускага гутарковага клуба і ўдзельнічае ў мерапрыемствах Месяца беларускай культуры, які ў цяперашні час праходзіць у Маскве пад эгідай Пасольства.