У Свяце Вясны, якім па традыцыі лічыцца Кітайскі Новы год, прынялі ўдзел рэктар ГрДУ імя Янкі Купалы Ірына Кітурка, прарэктары ўніверсітэта, выкладчыкі і супрацоўнікі, студэнты, сярод якіх навучэнцы з Кітая, а таксама навучэнцы і педагогі СШ № 38 г. Гродна.

Звяртаючыся да ўдзельнікаў мерапрыемства, рэктар універсітэта Ірына Кітурка падкрэсліла, што дзякуючы студэнтам з Кітая ў ГрДУ імя Янкі Купалы існуе традыцыя святкаваць Кітайскі Новы год.

–«Навучанне кітайскіх студэнтаў унесла свой пялёстак ў суквецце замежных студэнтаў, якія выбіраюць наш універсітэт», - адзначыла Ірына Фёдараўна. Яна пажадала ўдачы, здароўя і шчасця ў новым годзе і сказала навагодняе прывітанне на кітайскай мове.

Працягнулася святкаванне канцэртнай праграмай. Госці маглі атрымаць асалоду ад выканання папулярных кітайскіх і еўрапейскіх кампазіцый на кітайскай мове, пачуць класічныя кітайскія вершы. Удзельнікі ўрачыстасці даведаліся пра гісторыю і асаблівасці падрыхтоўкі і сустрэчы Свята Вясны, праверылі свае веды навагодніх традыцый ханьцаў і паслухалі пра паходжанне ўсходняга гараскопа.

У гэты ж дзень ва ўніверсітэце прайшлі майстар-класы, дзе студэнты выразалі нацыянальныя кітайскія ўзоры з чырвонага пергамента, вучыліся пісаць іерогліфы, вязалі вузельчыкі і ажыўлена размаўлялі. Пасля навучальных заняткаў удзельнікі мерапрыемства дэманстравалі свае навыкі ў конкурсе па каліграфіі, падчас якога за 90 секунд было неабходна ў патрэбнай паслядоўнасці правільна напісаць іерогліф. Ацэньвала студэнтаў экспертнае журы, у склад якога ўвайшлі выкладчыкі-валанцёры з Кітая. Правільнае вымаўленне кітайскіх слоў і сваю артыстычнасць купалаўцы дэманстравалі ў конкурсе чытальнікаў.