Інтэрактыўную прафарыентацыйную выставачную пляцоўку Гродзенскага дзяржаўнага ўніверсітэта імя Янкі Купалы прадставілі факультэт давузаўскай падрыхтоўкі, прафсаюзны камітэт студэнтаў, факультэты ўніверсітэта. Выставу наведалі навучэнцы 8-11 класаў устаноў агульнай сярэдняй адукацыі.
На працягу ўсяго мерапрыемства прадстаўнікі рэгіянальнага цэнтра тэсціравання і прафарыентацыі моладзі актыўна праводзілі даведачна-інфармацыйныя кансультацыі для будучых абітурыентаў, іх бацькоў і педагогаў аб асаблівасцях паступлення ў наш універсітэт, магчымасцях давузаўскай падрыхтоўкі. Актывісты прафкама студэнтаў захоплена расказвалі пра вучобу, адказвалі на пытанні школьнікаў. Студэнты юрыдычнага факультэта прапанавалі школьнікам паспрабаваць сябе ў ролі экспертаў-крыміналістаў - кожны жадаючы мог паўдзельнічаць у складанні фотаробата і ўбачыць, як здымаюцца адбіткі пальцаў. Будучыя педагогі - студэнты педагагічнага факультэта - правялі майстар-клас па дзіцячай творчасці. Сваімі яркімі ўражаннямі і эмоцыямі школьнікі дзяліліся з прадстаўнікамі Студэнцкага медыяцэнтра.
Таксама будучыя абітурыенты актыўна ўдзельнічалі ў прафарыентацыйным трэнінгу, прапанаваным педагогамі-псіхолагамі рэгіянальнага цэнтра тэсціравання і прафарыентацыі моладзі.
–Сёння маладым людзям у гульнявой форме было прапанавана выбраць сферу працы, у рамках якой яны хацелі б вучыцца, працаваць, развівацца і ўдасканальвацца ў далейшым прафесійным жыцці. Гэта дапамагае старшакласнікам зрабіць свядомы падыход да выбару прафесіі, уласнаму прафесійна-асобаснаму развіццю, выяўленню і рэалізацыі сваіх магчымасцяў, што з'яўляецца залогам іх паспяховай будучыні, - адзначыла начальнік рэгіянальнага цэнтра тэсціравання і прафарыентацыі моладзі Аксана Валюк.