На базе ГрДУ імя Янкі Купалы Дабрачынны міжнародны форум «Студэнцкія сустрэчы» праходзіць у другі раз. У рамках адкрыцця мерапрыемства прадстаўнік Фонду «Дапаможам ім жыць» Лучана Брагоні ўручыў прарэктару па выхаваўчай працы ГрДУ імя Янкі Купалы Васілію Сянько памятны знак, які сімвалізуе ўдзел універсітэта ў Форуме.

Вітаючы ўдзельнікаў сустрэчы, прарэктар па выхаваўчай працы Васілій Сянько адзначыў, што ГрДУ імя Янкі Купалы супрацоўнічае з фондам з 2011 года. У рамках сённяшняга форуму студэнты аказваюць дабрачынную падтрымку дзецям-сіротам, абменьваюцца вопытам валанцёрскага руху. Васілій Васільевіч падкрэсліў, што сёння валанцёрскія рухі развіваюцца ва ўсёй Беларусі, а валанцёры-купалаўцы актыўна супрацоўнічаюць з медыцынскімі ўстановамі Гродна і дапамагаюць у зборы сродкаў для тых, хто жыве ў нястачы.

Прадстаўнік Фонду «Дапаможам ім жыць» Лучана Брагоні распавёў валанцёрам пра гісторыю стварэння Фонду і дабрачыннага форуму.

- Фонд «Дапаможам ім жыць» працуе ў Беларусі з 1992 года. Мы займаемся мноствам інтэрнацыянальных праектаў, такіх як школа-фабрыка, аздараўленне дзяцей за мяжой, падтрымка сацыяльна неабароненых слаёў насельніцтва, усынаўленне студэнтаў на адлегласці. Першы форум «Студэнцкія сустрэчы» быў праведзены ў 2011 годзе ў Мінскім медыцынскім універсітэце. На сённяшні дзень фонд супрацоўнічае з дзесяццю ўніверсітэтамі Беларусі, - адзначыў Лучана Брагоні.

Ён падкрэсліў, што беларускія студэнты актыўна падтрымліваюць усе ініцыятывы і ўдзельнічаюць у праектах.

У рамках першага дня Форуму валанцёры абмяняюцца вопытам па хвалюючым моладзь праблемах у фармаце дыскусійных пляцовак, на якіх будуць закрануты праблемы фарміравання інтэрнэт-залежнасці ў моладзі, прафесійнага самавызначэння і цяжкасцяў першага працоўнага месца. Завершыцца дзень «Увечары сяброўства» у моладзевым цэнтры «Сонечнай сістэмы».

Нагадаем, што 22 верасня адбудзецца выступленне прэзідэнта Італьянскага дабрачыннага Фонду «Дапаможам ім жыць» Фабрыцыо Пачыфічы, прэзентацыя і абмеркаванне распрацаваных праектаў, дабрачынны кірмаш і акцыя «Свята дзяцінства» у парку імя Жылібера, італьянская вячэра і дабрачынны канцэрт гурта «Radiance».

У дзень закрыцця, 23 верасня, для ўдзельнікаў форуму запланавана экскурсійная праграма па Гродна, падвядзенне вынікаў дабрачынны кірмашы і ўручэнне сабраных сродкаў дырэктару Васілішкаўскага дома-інтэрната для дзяцей-інвалідаў з асаблівасцямі псіха-фізічнага развіцця.