Таксама ў сустрэчы прынялі ўдзел другі сакратар Пасольства Рэспублікі Казахстан у Рэспубліцы Беларусь Талгат Рыскелдзіеў і Консул Рэспублікі Казахстан у Брэсце Эльдар Кунаеў.

Ад імя рэктара ГрДУ імя Янкі Купалы гасцей прывітаў першы прарэктар універсітэта Алег Раманаў. Ён падкрэсліў, што супрацоўніцтва ГрДУ імя Янкі Купалы з універсітэтамі і арганізацыямі Казахстана з'яўляецца шматпланавым, а таксама выказаў надзею на тое, што сустрэча стане імпульсам для далейшага плённага супрацоўніцтва і запэўніў аб гатоўнасці купалаўскага ўніверсітэта стаць пляцоўкай для рэалізацыі беларуска-казахстанскіх ініцыятыў у розных сферах. У сваю чаргу Ермухамет Ертысбаеў адзначыў высокі ўзровень адукацыі ў Беларусі, а таксама кантактаў паміж ВНУ дзвюх краін, якія паспяхова развіваюцца ў розных галінах. Сярод прыярытэтных для ўзаемадзеяння ўстаноў вышэйшай адукацыі дзвюх краін Ермухамет Ертысбаеў назваў навуковую сферу.

Падчас сустрэчы прадстаўнікі ГрДУ імя Янкі Купалы расказалі пра вынікі супрацоўніцтва з ВНУ Казахстана і абмеркавалі напрамкі пашырэння ўзаемадзеяння ў сферы адукацыі і навукі, вытворчасці навукаёмістай прадукцыі, падрыхтоўцы кадраў вышэйшай кваліфікацыі, акадэмічнай мабільнасці.

У прыватнасці, актыўна развіваецца партнёрства з Акцюбінскім рэгіянальным дзяржаўным універсітэтам імя К. Жубанава (г. Актобэ) у галіне пастаўкі навукова-тэхнічнай прадукцыі, рэалізацыі сумесных навуковых праектаў, яшчэ адзін вектар супрацоўніцтва - узаемадзеянне з Некамерцыйнай установай «Незалежнае агенцтва акрэдытацыі і рэйтынгу» (г. Астана). У рамках супрацоўніцтва казахстанскія навукоўцы чытаюць лекцыйныя курсы па праграме «Запрошаны прафесар», праводзяць майстар-класы і трэнінгі, двухбаковае супрацоўніцтва ажыццяўляецца ў рамках акадэмічнай мабільнасці студэнтаў. Грамадзяне Казахстана навучаюцца ў магістратуры і аспірантуры па эканамічных, юрыдычных і педагагічных спецыяльнасцях, удзельнічаюць у вебінарах. Таксама праходзіць падрыхтоўка сумесных заявак на ўдзел у конкурсах навукова-тэхнічных праектаў, якія праводзяцца органамі дзяржаўнага кіравання Казахстана і Беларусі на грантавае фінансаванне па навукова-даследчых праектах «Рэгіянальная палітыка ў Беларусі і Казахстане: кампаратыўны аналіз» і «Распрацоўка тэхналогіі развіцця камунікатыўнай кампетэнцыі студэнтаў». Акрамя таго, казахскія навукоўцы ўваходзяць у склад Міжнароднага рэдакцыйнага савета навуковага часопіса «Вестнік ГрДУ імя Янкі Купалы», праходзяць навуковыя стажыроўкі ў купалаўскім універсітэце. Вядзецца актыўнае ўзаемадзеянне з Камітэтам па кантролю ў сферы адукацыі Міністэрства адукацыі Рэспублікі Казахстан, а таксама прапрацоўваецца пытанне аб рэалізацыі праграмы двудыпломнай адукацыі з прысваеннем ступені бакалаўра або магістра.

Дзейнасць Навукова-тэхналагічнага парку ў Гродзенскім універсітэце і ўдзел ГрДУ ў апрабацыі мадэлі «Універсітэт 3.0» прэзентаваў прарэктар па вучэбнай працы Генадзій Гачко. Генадзій Аляксеевіч прапанаваў сумеснае развіццё вектара прадпрымальніцкай дзейнасці, у тым ліку ў гуманітарнай сферы.

Пасля сустрэчы з кіраўніцтвам ГрДУ імя Янкі Купалы адбылася прэзентацыя кнігі Прэзідэнта Казахстана Нарсултана Назарбаева «Эра незалежнасці» студэнтам і супрацоўнікам універсітэта. Падчас мерапрыемства студэнты змаглі задаць пытанні Ермухамету Ертысбаеву. Купалаўцаў цікавіла арганізацыя сістэмы вышэйшай адукацыі Казахстана, асаблівасці дыпламатычнай прафесіі і беларуска-казахстанскае супрацоўніцтва.