Беларускі каравай, святочны стол з мёдам і традыцыйнай беларускай выпечкай чакалі ўдзельнікаў Летняй школы ў гуманітарным каледжы ГрДУ імя Янкі Купалы, дзе іх сустрэлі навучэнцы, выкладчыкі і дырэктар. Навучэнцы каледжа пазнаёмілі замежных гасцей з нацыянальнымі традыцыямі і падрыхтавалі інтэрактыўную праграму: нацыянальныя гульні, беларускі танец, а таксама беларускія народныя і сучасныя песні.

Акрамя таго, удзельнікі Летняй школы наведалі майстар-клас, які праводзіла выкладчык кафедры тэхналогіі, фізіялогіі і гігіены харчавання факультэта біялогіі і экалогіі Наталля Чугай. Сваімі рукамі слухачы падрыхтавалі традыцыйныя нацыянальныя стравы: сырнікі, смажанку, збіцень, морс, блінцы, печаныя яблыкі.

Беларускі вечар сабраў за святочным сталом гасцей, валанцёраў і выкладчыкаў Летняй школы рускай мовы. Валанцёры пазнаёмілі ўдзельнікаў з элементамі абраду святкавання «Дажынак». Удзельнікі гулялі ў народныя гульні, рабілі абярэгі, развучвалі старадаўні беларускі танец «Маразуля», адгадвалі загадкі. За святочным сталом адначасова праходзіла прэзентацыя прыгатаваных страў - на рускай мове ўдзельнікі дзяліліся адзін з адным кулінарнымі рэцэптамі. Фотазона, упрыгожаная ў этнічным стылі, дазволіла ўсім жадаючым зрабіць памятныя фота.