Прадстаўнікі 10 краін свету пачнуць вывучэнне рускай мовы і пазнаёмяцца з беларускай культурай ужо 5 жніўня.Як распавяла каардынатар Летняй школы, старшы выкладчык кафедры моўнай падрыхтоўкі беларускіх і замежных грамадзян Ірына Краскоўская, праграма Летняй школы прызначана для замежных грамадзян, якія жадаюць сумясціць вывучэнне рускай мовы са знаёмствам з культурай Беларусі. У гэтым годзе школа прымае ўдзельнікаў з Бельгіі, Германіі, Іспаніі, Італіі, Кітая, Польшчы, ЗША, Францыі, Японіі і Азербайджана. Акрамя студэнтаў, магістрантаў і аспірантаў, у складзе удзельнікаў - трэнер і менеджэр па продажах, інжынер-лейтэнант арміі. Самаму малодшаму ўдзельніку 17 гадоў, а самаму старэйшаму 61 год (прыязджае ў трэці раз).
У праграме працы Летняй школы-2018 - заняткі па рускай мове, адзін з курсаў па выбары: «Дзелавая руская мова», «Караоке па-руску», «Беларуская мова», а таксама культурная праграма ў другой палове дня, якая ўключае экскурсіі ў межах горада, лекцыі па гісторыі і культуры Беларусі, майстар-класы па вырабе беларускіх сувеніраў і падрыхтоўцы страў беларускай кухні, наведванне мясцовых прадпрыемстваў, знаёмства з беларускім кінематографам; а таксама нефармальныя зносіны з беларускімі студэнтамі на працягу ўсёй Летняй школы.
Па заканчэнні праекта замежнікі атрымаюць сертыфікат удзельніка Летняй школы рускай мовы ГрДУ імя Янкі Купалы.
Нагадаем, што ўпершыню Летняя школа рускай мовы прайшла ў 2015 годзе. Праект прадоўжыўся ў лютым наступнага года як Зімовая школа рускай мовы. У цяперашні час Летняя і Зімовая школы паспяхова дзейнічаюць пры купалаўскім універсітэце і штогод збіраюць дзясяткі замежнікаў, якія жадаюць вывучаць рускую мову і знаёміцца з унікальнай культурай, традыцыямі, прыродай і архітэктурай Беларусі.
Ініцыятарам і арганізатарам праекта выступае кафедра моўнай падрыхтоўкі беларускіх і замежных грамадзян факультэта давузаўскай падрыхтоўкі.
Больш падрабязная інфармацыя даступная па спасылках: