Шчаслівымі ўладальнікамі 100-бальных сертыфікатаў ў гэтым годзе сталі 30 юнакоў і дзяўчат. На мерапрыемстве таксама ўшаноўвалі тых, хто набраў больш за 90 балаў па прадмеце тэсціравання.

З паспяховымі вынікамі цэнтралізаванага тэсціравання рабят павіншавалі рэктар ГрДУ імя Янкі Купалы Ірына Кітурка, старшыня Камітэта дзяржаўнага кантролю Гродзенскай вобласці Анатолій Дарожка, старшыня Гродзенскага абласнога Савета дэпутатаў Ігар Жук, начальнік галоўнага ўпраўлення адукацыі Гродзенскага аблвыканкама Аляксандр Сангін, а таксама педагогі, родныя і блізкія абітурыентаў.

Урачыстую цырымонію адкрыла рэктар Ірына Кітурка. Яна звярнулася да юнакоў і дзяўчат з найлепшымі пажаданнямі: «Вы зараз стаіце перад важным выбарам, які ў далейшым будзе вызначаць ўсё вашае жыццё. Вы ўжо даказалі, што вы лепшыя, але нельга спыняцца на дасягнутым. Мы бачым у вас вялікі патэнцыял і хочам, каб усе вы сталі часткай дружнай сям'і купалаўцаў. Мы хочам, каб наш універсітэт стаў універсітэтам вашых магчымасцяў. Місія нашага ўніверсітэта менавіта ў тым і заключаецца, каб выявіць, раскрыць і рэалізаваць ваш патэнцыял у складаным прасторы міжкультурнага дыялогу. Я жадаю вам поспехаў, творчага, цікавага, насычанага студэнцкага жыцця і буду вельмі рада бачыць вас 1 верасня на сустрэчы першакурснікаў з рэктарам універсітэта».

Віншуючы абітурыентаў, старшыня Камітэта дзяржаўнага кантролю Гродзенскай вобласці Анатолій Дарожка падкрэсліў, што цэнтралізаванае тэсціаванне - гэта важнейшы этап уступнай кампаніі: «Працэс прайшоў на высокім узроўні. У гэтым годзе ў Гродзенскай вобласці не зафіксавана ніводнага выпадку парушэння ЦТ. Працэдура цэнтралізаванага тэсціравання ў нашым рэгіёне выразна адладжаная і адпрацаваная. Гэтая сістэма ў нас носіць цэнтралізаваны характар ​​дзякуючы наяўнасці каардынуючага абласнога цэнтра ЦТ, якім з'яўляецца Гродзенскі дзяржаўны ўніверсітэт імя Янкі Купалы. Дакладная і зладжаная праца дазваляе стварыць максімальна спрыяльныя, камфортныя і роўныя ўмовы для кожнага абітурыента, каб дзеці маглі паказаць на ЦТ свае самыя лепшыя вынікі. Сённяшняе мерапрыемства - лепшы доказ таго, што гэтую задачу нам удалося рэалізаваць у лепшым выглядзе», - паведаміў Анатолій Андрэевіч.

Поспехаў і правільнага выбару пажадаў абітурыентам старшыня Гродзенскага абласнога Савета дэпутатаў Ігар Жук. Ігар Георгіевіч таксама адзначыў, што традыцыйна па выніках цэнтралізаванага тэсціравання выпускнікі Гродзеншчыны паказваюць высокія дасягненні. У Рэспубліцы Беларусь сістэма адукацыі Гродзенскай вобласці ўжо на працягу шэрагу гадоў прызнаецца лепшай.

Выбраць прафесію, якая будзе прыносіць задавальненне, пажадаў дзецям начальнік галоўнага ўпраўлення адукацыі Гродзенскага аблвыканкама Аляксандр Сангін.

Настаўнікам, бацьком, педагогам і ўсім супрацоўнікам Гродзенскага дзяржаўнага ўніверсітэта імя Янкі Купалы за атрыманыя веды, прадастаўленыя ўмовы пры падрыхтоўцы і здачы цэнтралiзаванага тэсцiравання, магчымасць развіцця і самарэалізацыі ад імя ўсіх абітурыентаў падзякаваў выпускнік гімназіі №2 г. Гродна Аляксей Суцько. Вынік маладога чалавека на цэнтралізаваным тэсціраванні - 100 балаў па англійскай мове, 100 балаў па матэматыцы і 92 па рускай мове. Аляксей прызнаецца, што ўзмоцненую падрыхтоўку да цэнтралiзаванага тэсцiравання пачаў у 10 класе. Займаўся дадаткова на разнастайных факультатывах, удзельнічаў у інтэлектуальных конкурсах і алімпіядах. На высокія балы разлічваў, але, тым не менш, вынік пераўзышоў яго чаканні і прыемна здзівіў.

Дзелячыся ўражаннямі, выпускніца гімназіі №6 г. Гродна Дар'я Пракаповіч распавяла, што высокія балы на ЦТ шмат у чым удалося атрымаць дзякуючы падрыхтоўчым курсах ГрДУ імя Янкі Купалы, якія дзяўчына наведвала на працягу года. Дар'я здавала тэсціраванне па чатырох прадметах і па кожным з іх атрымала больш за 90 балаў.

Нагадаем, што ўсе, хто здаваў тэсціраванне ў горадзе Гродна, з 10 ліпеня могуць атрымаць сертыфікаты цэнтралізаванага тэсціравання па адрасе: вул. Кастрычніцкая, 5. Пры сабе неабходна мець пашпарт і пропуск з адзнакай "Тэсціраванне прайшоў".