Надрукаваць гэтую старонку
Апублікавана ў Панядзелак, 02 Красавік 2018 10:53

Зацверджаны тэрміны ўступнай кампаніі - 2018

IMG 5751Пастановай Міністэрства адукацыі Беларусі №14 ад 15 сакавіка 2018 года вызначаны тэрміны правядзення ўступнай кампаніі ва ўстановы вышэйшай адукацыі.

 

Пастановай устаноўлены тэрміны прыёму дакументаў ад абітурыентаў. Так, з 12 па 17 ліпеня яны будуць прымацца ад асоб, якія жадаюць атрымаць вышэйшую адукацыю ў дзяржаўных ВНУ за кошт сродкаў рэспубліканскага бюджэту або ва ўстановах вышэйшай адукацыі на платнай аснове. З 15 лістапада па 5 снежня будзе ажыццяўляцца прыём дакументаў ад тых, хто паступае на завочную форму атрымання адукацыі ва ўстановы вышэйшай адукацыі сельскагаспадарчага профілю.

Графікі прыёму дакументаў у абітурыентаў, якія паступаюць у ВНУ для атрымання вышэйшай адукацыі на платнай аснове і не  здаюць уступныя выпрабаванні, выглядаюць так: з 12 па 31 ліпеня - у Акадэміі МУС, Магілёўскім інстытуце МУС, Універсітэце грамадзянскай абароны МНС; з 12 ліпеня па 2 жніўня - у Беларускай дзяржаўнай акадэміі мастацтваў, Беларускай дзяржаўнай акадэміі музыкі, Беларускім дзяржаўным універсітэце культуры і мастацтваў; з 12 ліпеня па 4 жніўня - у іншых установах вышэйшай адукацыі. Выпускнікі профільных класаў (груп) педагагічнай накіраванасці, якія паступаюць на педагагічныя спецыяльнасці, змогуць падаць дакументы ў ВНУ з 12 па 14 ліпеня. Пастановай таксама вызначаны тэрміны правядзення ўступных выпрабаванняў. Так, з 18 па 21 ліпеня яны адбудуцца ў Магілёўскім інстытуце МУС, Універсітэце грамадзянскай абароны МНС. З 18 па 26 ліпеня - у Беларускай дзяржаўнай акадэміі мастацтваў, Беларускай дзяржаўнай акадэміі музыкі, Беларускім дзяржаўным універсітэце культуры і мастацтваў. З 18 па 25 ліпеня (у вочнай форме атрымання адукацыі) і з 6 па 15 снежня (у завочнай) у ВНУ сельскагаспадарчага профілю. З 18 па 24 ліпеня - у іншых ВНУ. Таксама вызначаны тэрміны залічэння абітурыентаў і дадатковага набору ў дзяржаўныя ўстановы вышэйшай адукацыі на месцы, якія вызначаны кантрольнымі лічбамі прыёму, што засталіся вакантнымі пасля залічэння абітурыентаў. Акрамя таго, устаноўлены тэрміны уступнай кампаніі для замежных грамадзян і асоб без грамадзянства, а таксама для грамадзян Украіны і асоб без грамадзянства, якія пражывалі (як правіла, не менш за год) на тэрыторыі Данецкай і Луганскай абласцей Украіны і якія прыбылі ў Беларусь для атрымання дазволаў на часовае або пастаяннае пражыванне.

Па матэрыялах БЕЛТА