Праект «Спартыўны поспех» рэалізуецца ў перыяд з 2016 па 2020 гады. Дадзены праект садзейнічае развіццю ў студэнцкай моладзі ўстойлівых матывацыйна-каштоўнасных арыентацый на высокія спартыўныя дасягненні.

Палажэнне аб праекце

У рамках праекта запланавана:

• фарміраванне ў студэнцкай моладзі ўяўленні аб спорце, як пра спосаб арганізацыі актыўнага і здаровага вольнага часу, самарэалізацыі;
• стварэнне ўмоў для дасягнення спартыўных поспехаў навучэнцаў;
• уцягванне студэнцкай моладзі ў актыўную спартыўную дзейнасць ва ўніверсітэце;
• развіццё сістэмы студэнцкага самакіравання на прынцыпах партнёрства і актыўнага ўдзелу ў спартыўным жыцці ўніверсітэта;
• прыцягненне ўвагі грамадскасці да развіцця масавага маладзёжнага спорту, які спрыяе ўмацаванню здароўя моладзі і здароўя нацыі ў імкненні да дасягнення спартыўных поспехаў;
• папулярызацыя спартыўных дасягненняў універсітэта на ўзроўні горада, вобласці, рэспублікі, міжнародным узроўні.

Кіраўнік праекта: Кірыл Іванавіч Акуліч, начальнік спартыўнага клуба, тэл. 75-34-50

Мерапрыемствы

У ГрДУ імя Янкі Купалы ўшаноўвалі студэнтаў-спартсменаў і іх трэнераў за высокія дасягненні на II Еўрапейскіх гульнях

Урачыстае мерапрыемства прайшло ў Купалаўскім універсітэце 13 чэрвеня.

З 21 па 30 чэрвеня гэтага года Беларусь упершыню ў сваёй гісторыі стала цэнтральным месцам падзей галоўнага спартыўнага мерапрыемства Еўропы. У яго эпіцэнтры апынуліся студэнты і магістранты Гродзенскага дзяржаўнага ўніверсітэта імя Янкі Купалы: студэнт 4 курса факультэта фізічнай культуры Радзік Куліеў, студэнты 2 курса факультэта фізічнай культуры Павел Лях і Аляксандр Грабовік, студэнт 5 курса факультэта фізічнай культуры Саслан Даураў, магістрантка факультэта фізічнай культуры Таццяна Мацко, магістрантка факультэта псіхалогіі Кацярына Калюжная, магістрантка факультэта фізічнай культуры Ксенія Даніловіч, магістрант факультэта фізічнай культуры Віталь Пясняк, а таксама студэнт першага курса факультэта фізічнай культуры Ігар Зубко і выпускнік юрыдычнага факультэта Мікіта Чайкоўскі. Для беларускай зборнай рабяты прынеслі чатыры медалі: два сярэбраныя - Ігар Зубко па лёгкай атлетыцы і Аляксандр Грабовік ў грэка-рымскай барацьбе, а таксама два бронзавыя медалі: Саслан Даураў у грэка-рымскай барацьбе і Таццяна Мацко ў самба.

Зусім нядаўна рабяты выкладваліся па максімуме, змагаючыся за перамогу на спартыўных арэнах Мінска. За кожнага з іх хварэлі купалаўцы, гродзенцы і ўся краіна. А сёння яны - у роднай альма-матэр. Сваімі яркімі спартыўнымі касцюмамі з лагатыпам II Еўрапейскіх гульняў, а таксама медалямі і эмоцыямі на тварах рабяты прынеслі дух учорашніх выступаў у акадэмічную аўдыторыю.

Акрамя студэнтаў-спартсменаў, на сустрэчу запрошаныя былі трэнеры - прафесар кафедры спартыўнага выхавання і спорту Вячаслаў Максімовіч і загадчык кафедры спартыўных гульняў Аляксандр Бардзін, а таксама прадстаўнікі факультэта фізічнай культуры і Спартыўнага клуба ўніверсітэта.

Рэктар ГрДУ імя Янкі Купалы Ірына Кітурка падзякавала асабіста кожнаму ўдзельніку II Еўрапейскіх гульняў і адзначыла:

- Сёння сабраліся тыя, хто з'яўляецца гонарам нашага ўніверсітэта. Вы падарылі незабыўныя імгненні, перажытыя эмоцыі ля экранаў тэлевізара для ўсяго ўніверсітэта і ўсёй краіны. Ад усяго калектыву я хачу сказаць вам вялікі дзякуй! Вы ўсе стараліся, вы былі сканцэнтраванымі і выкладваліся на поўную сілу. Самае важнае цяпер - прааналізаваць тое, што было, і з новымі сіламі, эмоцыямі, запалам і цярпеннем ісці да новых перамог.

Асобна рэктар звярнулася да трэнераў:

- У сваіх выхаванцаў вы ўкладваеце душу, усе свае веды і ўменні. Нізкі паклон вам за тое, што вы дапамагаеце нашым студэнтам-спартсменам стаць прафесіяналамі высокага ўзроўню.

Ірына Фёдараўна пажадала рабятам далейшых поспехаў і перамог і ўручыла памятныя сувеніры, трэнеры спарстменаў былі адзначаны лістамі падзякі.

У сваю чаргу самі рабяты падзяліліся ўражаннямі ад удзелу ва II Еўрапейскіх гульнях.

Аляксандр Грабовік па выніках спаборніцтваў па грэка-рымскай барацьбе на II Еўрапейскіх гульнях заваяваў сярэбраны медаль. Ён распавёў, што адчуваў пасля свайго выступу і без чаго адназначна не было б перамогі:

- Планамерная падрыхтоўка да выступлення ішла са студзеня, гэтаму этапу надавалася шмат увагі. Адразу пасля сутычкі было пачуццё прыкрасці, але ў той жа час не было шкадавання, што я нешта зрабіў не так ці штосьці не дарабіў. Разумеў, што па-іншаму выступіць не мог. Я выклаўся максімальна. Засталося прыемнае пачуццё ад праведзенай працы і ўзнагароды. Пасля Гульняў быў цалкам спустошаны. Калі прайшло каля двух тыдняў, дзякуючы журналістам пачаў усведамляць, якое маштабнае мерапрыемства праходзіла. Вядома, без падтрымкі сям'і - жонкі, мамы, іншых блізкіх сваякоў, кіраўніцтва ўніверсітэта, Рэспубліканскага цэнтра алімпійскай падрыхтоўкі, трэнераў, медперсаналу гэтая перамога была б немагчымай. Усё па ланцужку цябе вядуць да медаля. І калі ты яе заваёўваеш, то перажываеш, каб каму-небудзь не забыцца падзякаваць.

Па выніках спаборніцтваў па самба, у вагавай катэгорыі да 64 кг, бронзавы медаль заваявала Таццяна Мацко. Што ёй давялося перажыць да спаборніцтваў і што было чуваць пасля, немагчыма апісаць словамі. Але трохі ўсё ж яна распавяла:

- Падрыхтоўка да Гульняў ішла цэлы год. Былі траўмы, лячэнне, аднаўленне. Пасля чаго трэба было наладзіцца псіхалагічна, каб выйсці спакойнай, ня перахвалявацца, правільна размеркаваць сілы. А на спаборніцтвах выступаеш - і адразу становіцца відавочна, чаго ты варты. Адразу пасля выступу была засмучаная, ведаючы, што магла дасягнуць большага, да гэтага часу застаўся асадак. Хачу адзначыць, што вельмі дружная была група падтрымкі - сябры, сваякі, блізкія - усё вельмі актыўна хварэлі. Калі з трыбун крычалі «Беларусь» і маё імя, рэзка падскакваў адрэналін. Сваім вынікам засталася трохі незадаволеная. Хацелася большага, вядома. Аналізую цяпер тое, што не склалася, каб наганяць упушчанае, імкнуцца да большага.

Завяршылася сустрэча агульным фота на памяць.

20 мая 2019 года адбылася сустрэча рэктара ўніверсітэта Ірыны Кітурка з купалаўцамі, якія стануць валанцёрамі II Еўрапейскіх гульняў.

Удзельнікамі мерапрыемства сталі больш за 270 купалаўцаў, Рэктар універсітэта Ірына Кітурка, размаўляючы з рабятамі, падкрэсліла, што яны стануць удзельнікамі маштабнага мерапрыемства, якое будзе праходзіць на тэрыторыі Рэспублікі Беларусь:

- Падчас II Еўрапейскіх гульняў вы ў першую чаргу атрымаеце неацэнны асабісты вопыт, заведзяце новыя знаёмствы і атрымаеце моўную практыку. Таксама памятайце, што за вамі стаіць дваццацітысячны калектыў ГрДУ імя Янкі Купалы. Вы - гэта ўніверсітэт. Ад таго, як вы сябе праявіце, залежыць і імідж нашай краіны. Я шчыра веру, што вы апраўдаеце той давер, які вам аказаны. Ад вас залежыць вельмі многае!

Ірына Фёдараўна падзякавала рабятам за жаданне і ініцыятыву стаць валанцёрамі. Яна адзначыла, што ў верасні абавязкова адбудзецца сустрэча, дзе кожны купалавец зможа падзяліцца сваімі ўражаннямі аб удзеле ў якасці валанцёраў II Еўрапейскіх гульняў.

Варта адзначыць, што праца па падрыхтоўцы валанцёрскай каманды ў ГрДУ імя Янкі Купалы вядзецца пачынаючы з красавіка 2018 года. На базе ўніверсітэта створаны Цэнтр па падрыхтоўцы валанцёраў, у склад якога ўвайшлі прадстаўнікі ўніверсітэта. Агулам падрыхтоўка валанцёраў вядзецца па 20 напрамках. Рабяты будуць працаваць на пунктах акрэдытацыі, пратакола, медыцынскага абслугоўвання, дапамагаць у працы са СМІ і на пунктах прыбыцця. Сярод функцыянальных напрамкаў таксама лінгвістычныя паслугі, тэхнічная падтрымка і многае іншае.

Варта адзначыць, што адбор валанцёраў праходзіў у некалькі этапаў - дыстанцыйна і вочна. Усяго для арганізацыі і правядзення II Еўрапейскіх гульняў 2019 года будзе задзейнічана больш за восем тысяч валанцёраў, з іх больш за 278 - рабяты з ГрДУ імя Янкі Купалы, якія, па словах арганізатараў, будуць працаваць не толькі ў Мінску, але ў Гродне на фан-зонах і на памежных зонах пропуску.

Усяго ўдзельнічала 290 чалавек. З іх 20 супрацоўнікаў і 270 студэнтаў-валанцёраў.

Студэнты і супрацоўнікі ГрДУ імя Янкі Купалы - кандыдаты на ўдзел у II Еўрапейскіх гульнях.

17 мая 2019 года адбылося ўрачыстае мерапрыемства, прымеркаванае да Дня работнікаў фізічнай культуры і спорту.

Яго ўдзельнікамі сталі рэктар ГрДУ імя Янкі Купалы Ірына Кітурка, прарэктары, студэнты, якія дасягнулі высокіх вынікаў у спорце на міжнародным і рэспубліканскім узроўні, іх трэнеры, выкладчыкі ГрДУ імя Янкі Купалы, а таксама старшыня валейбольнага клуба "Гарадзенскі камунальнік" Аляксей Сівірчукоў, дырэктар Гродзенскага абласнога комплекснага цэнтра алімпійскага рэзерву Андрэй Бойша. У рамках мерапрыемства адбылося ўзнагароджанне каштоўнымі падарункамі, граматамі і  лістамі падзякі кіраўнікоў і трэнераў арганізацый партнёраў ГрДУ імя Янкі Купалы, трэнераў і выкладчыкаў купалаўскага ўніверсітэта, а таксама студэнтаў-спартсменаў. Дзесяць студэнтаў ГрДУ імя Янкі Купалы былі ўзнагароджаны сертыфікатамі «Спартсмен года 2018» і 14 работнікаў і студэнтаў атрымалі пасведчанні «Майстар спорту міжнароднага класа» і «Майстар спорту Рэспублікі Беларусь».

Кубкі і дыпломы пераможцаў і прызёраў круглагадовай спартакіяды ГрДУ імя Янкі Купалы атрымалі дэканы філалагічнага факультэта, фізіка-тэхнічнага факультэта, факультэта біялогіі і экалогіі, інжынерна-будаўнічага факультэта, факультэта матэматыкі і інфарматыкі, юрыдычнага факультэта і кіраўнікі спартыўнага выхавання на гэтых факультэтах.

Усяго ўдзельнічала 187 чалавек. З іх 87 супрацоўнікаў універсітэта і гасцей і 100 студэнтаў.

16 мая 2019 года праведзены турыстычныя майстар-класы ў Гальшанскай сярэдняй школе. У межах сустрэчы студэнты і выкладчыкі ГрДУ імя Янкі Купалы расказалі навучэнцам аб адукацыйным і навуковым патэнцыяле ўніверсітэта, прэзентавалі спецыяльнасці і правялі турыстычныя майстар-класы. Студэнты ГрДУ імя Янкі Купалы падрыхтавалі для дзяцей насычаную праграму. Прайшлі майстар-класы па пераадоленні тэхнічнага этапу пешаходнага турызму «Навясная пераправа» і пераадоленні дыстанцыі фігурнага кіравання тэхнікі велатурызму. Пад кіраўніцтвам студэнтаў рабяты асвоілі тэхніку звязвання турысцкіх вузлоў, а таксама пераадолелі тэхнічны этап пешаходнага турызму «Навясная пераправа» і дыстанцыю фігурнага кіравання, якая ўключае ў сябе фігуры «васьмёрка», «вароты», «перанос прадметаў», «змейка». Усяго ўдзельнічала 18 прадстаўнікоў ГрДУ. З іх 8 супрацоўнікаў і 10 студэнтаў.

25 красавіка 2019 года праведзены спартыўныя спаборніцтвы студэнтаў з Туркменістана і Беларусі.

Ганаровымі гасцямі мерапрыемства сталі Надзвычайны і Паўнамоцны Пасол Туркменістана ў Рэспубліцы Беларусь Шакулыеў Назаркулы Шакулыевіч і першы сакратар Пасольства Туркменістана ў Рэспубліцы Беларусь Язмырат Дурдымырадаў. Варта адзначыць, што сумесныя спартыўныя мерапрыемствы з нагоды штогадовых масавых спартыўных і фізкультурна-аздараўленчых мерапрыемстваў, якія праводзяцца ў Туркменістане пад дэвізам «Здароўе і шчасце», прайшлі ў ГрДУ імя Янкі Купалы ўпершыню. Студэнты ГрДУ імя Янкі Купалы і ГрДМУ спаборнічалі ў міні-футболе. Прайшлі спаборніцтвы па перацягванні ліны, а таксама туркменскія нацыянальныя гульні «Дастань хустку» і «Дуззум», спаборніцтвы па шахматах.

Усяго ўдзельнічала 163 чалавекі. З іх 72 удзельнікі-студэнты, 18 супрацоўнікаў і 73 заўзятара.

26 сакавіка 2019 года ў рамках свята "Наўруз Байрам" праведзены сумесныя спартыўныя мерапрыемствы з замежнымі студэнтамі па нацыянальнай барацьбе «Гарэш». Наўруз - свята вясновага раўнадзенства і пачатку новага сельскагаспадарчага года ў пэрсамоўных і некаторых цюркамоўных народаў Казахстана, Сярэдняй і Малой Азіі, Ірана, а таксама сярод башкір і татараў. Ужо ў трэці раз у ГрДУ імя Янкі Купалы арганізоўваюць нацыянальную ўрачыстасць вясновага раўнадзенства. Аматараў спартыўных спаборніцтваў аб'яднаў турнір па нацыянальнай туркменскай барацьбе Гарэш. Гэта адна з разнавіднасцяў спартыўнай барацьбы на паясах, якая сваімі каранямі ўзыходзіць да глыбокай старажытнасці. У гістарычных крыніцах сустракаюцца паведамленні пра тое, што ў продкаў туркмен прыёмамі барацьбы валодалі не толькі мужчыны, але і жанчыны. У Гарэш змагарам неабходна зарабляць балы, прымушаючы суперніка закрануць дывана любой часткай цела акрамя ступняў.

Усяго ўдзельнічала 109 чалавек. З іх 19 студэнтаў-удзельнікаў і 90 заўзятараў.

Трэнер каманды "Рэгіён-ГрДУ" чэмпіянату Рэспублікі Беларусь па міні-футболе сярод жанчын - старшы выкладчык кафедры спартыўных гульняў Паўлюць Вольга Віктараўна і яе выхаванкі правялі майстар-клас гульні ў міні-футбол для студэнтаў універсітэта.

06.04.2018

Жаночая каманда вышэйшай лігі чэмпіянату Рэспублікі Беларусь па валейболе "Камунальнік-ГрДУ" правяла майстар-клас для студэнтаў-спартсменаў універсітэта.

04.04.2017

Трэнер баскетбольнай каманды вышэйшай лігі чэмпіянату Рэспублікі Беларусь "Прынямоння-ГрДУ" - старшы выкладчык кафедры фізічнага выхавання і спорту Маклакоў Віталь Анатольевіч і яго выхаванцы правялі майстар-клас гульні ў баскетбол для студэнтаў і выкладчыкаў універсітэта.

23.11.2017

У ГрДУ імя Янкі Купалы ўшаноўвалі студэнтаў-спартсменаў. На мерапрыемства былі запрошаны студэнты і выпускнікі, якія ствараюць спартыўную славу Гродзенскаму дзяржаўнаму ўніверсітэту імя Янкі Купалы. Сярод іх пераможцы і прызёры чэмпіянатаў свету і Еўропы, Еўрапейскіх гульняў, рэспубліканскіх спаборніцтваў, майстры спорту, у тым ліку і міжнароднага класа. Гэта змагары Радзік Куліеў, Аляксандр Грабовік, Сяргей Маляўскі, Ілля Лаўрыновіч, Андрэй Міхайлоўскі, Максім Пашкоў, а таксама лёгкаатлеты Максім Андралойць і Ірына Жук.

19.05.2017 

Спартыўны вечар, прысвечаны Дню работнікаў фізічнай культуры і спорту, адбыўся ў Гродзенскім дзяржаўным універсітэце імя Янкі Купалы 19 мая. Ва ўрачыстым мерапрыемстве прынялі ўдзел студэнты-спартсмены, іх трэнеры, дэканы факультэтаў, выкладчыкі і прадстаўнікі Гродзенскага гарадскога выканаўчага камітэта.

28.04.2017

У рамках праекта «Спартыўны поспех» баскетбалісты «Прынямоння-ГрДУ» распавялі пра свае трэніроўкі, падрыхтоўцы да рэспубліканскіх спаборніцтваў, а таксама прадэманстравалі тактычныя прыёмы вядзення гульні, паказалі тэхніку вядзення мяча, здзяйснення кідкоў.

06.03.2017

Каманда ГрДУ імя Янкі Купалы ў трэці раз стала пераможцам Міжнароднага адкрытага турніру па валейболе сярод жаночых каманд на Кубак рэктара ўніверсітэта. У гэтым годзе спаборніцтвы праходзілі ў трэці раз. Па традыцыі ў турніры прынялі ўдзел каманды з ГрДУ імя Янкі Купалы, Універсітэта ў Беластоку, Балтыйскага федэральнага ўніверсітэта імя І. Канта, Гродзенскай абласной спецыялізаванай дзіцяча-юнацкай спартыўнай школы алімпійскага рэзерву імя А.М. Сапегі. Навічкамі сталі студэнткі Гродзенскага дзяржаўнага медыцынскага ўніверсітэта.

01.11.2016

Спаборніцтвы па міні-футболе прайшлі 1 лістапада ў сценах Гродзенскага дзяржаўнага ўніверсітэта імя Янкі Купалы і былі прысвечаны 25-годдзю Незалежнасці Туркменістана. Турнір быў арганізаваны Зямляцтвам замежных студэнтаў пры падтрымцы Цэнтра інтэрнацыяналізацыі адукацыі і спартыўнага клуба.