Васілій Васільевіч павіншаваў купалаўцаў з перамогай на прэстыжных спаборніцтвах і пажадаў юнакам і дзяўчатам новых здзяйсненняў, перамог і заваявання вяршынь спартыўнага Алімпу. Словы падзякі прагучалі і ў адрас трэнерскага складу - старшага выкладчыка кафедры спартыўных гульняў Аркадзія Абялеўскага і старэйшага выкладчыка кафедры фізічнага выхавання і спорту Станіслава Лісоўскага, якія паспяхова падрыхтавалі каманды да ўдзелу ў спаборніцтвах.

Нагадаем, што мужчынская зборная ГрДУ імя Янкі Купалы па міні-футболе і жаночая каманда па валейболе атрымалі перамогу на спартакіядзе Саюзнай дзяржавы, якая нядаўна  праходзіла ў Брэсце. Лепшай у спаборніцтвах па баскетболе, якія адбыліся ў рамках трэцяга этапу спартакіяды ў Варонежы, стала яшчэ адна жаночая зборная ўніверсітэта. Там жа перамогу ў скарбонку спартыўных дасягненняў купалаўскага ўніверсітэта прынесла студэнтка факультэта біялогіі і экалогіі Яна Вараб'ёва, якая заняла першае месца ў асабістых спаборніцтвах па настольным тэнісе.

– Мы пастаянна сочым за вашымі поспехамі, - адзначыў Заслужаны трэнер СССР і БССР, прафесар, загадчык кафедры фізічнага выхавання і спорту Вячаслаў Максімовіч. - Дзякуючы намаганням студэнтаў ГрДУ імя Янкі Купалы займае лідзіруючыя пазіцыі ў галіне студэнцкага спорту краіны і да таго ж ідзе другім па выніках Рэспубліканскай універсіяды - 2017. Наперадзе яшчэ некалькі спаборніцтваў, якія пакажуць канчатковыя вынікі. Мы ўпэўнены ў сілах нашых рабят.

Вячаслаў Аляксандравіч нагадаў, што у 2019 годзе ў Мінску пройдуць II Еўрапейскія гульні, і выказаў надзею, што купалаўцы стануць удзельнікамі гэтых маштабных моладзевых спаборніцтваў і зоймуць прызавыя месцы.