Песні, працятыя словамі любові і пяшчоты да мамы і Радзімы, выканалі школьнікі, навучэнцы каледжаў, студэнты, работнікі прадпрыемстваў, устаноў і арганізацый горада. Ацэньвала выступленні канкурсантаў журы ў складзе прадстаўнікоў Гродзенскага абласнога і выканаўчага камітэтаў, грамадскіх аб'яднанняў і арганізацый горада.

– Беларускі саюз жанчын уносіць вялікі ўклад у росквіт Беларусі, арганізуючы рознага роду конкурсы. І сёння мы з'яўляемся сведкамі адной з ініцыятыў жанчын Гродзеншчыны - конкурсу «Лепшая песня пра любімую маму, пра родную Беларусь», дзякуючы якому мы адкрываем і паказваем новыя таленты, - адзначыла намеснік старшыні Гродзенскага гарвыканкама Зоя Кулеша.

Пераможцаў выбралі ў некалькіх намінацыях. Так, лепшым салістам сярод дзяцей прызнана вучаніца сярэдняй школы № 33 г. Гродна Вікторыя Аплевіч, сярод падлеткаў - вучань сярэдняй школы № 3 імя В.М. Усава г. Гродна Расціслаў Чарнецкі, сярод дарослых - супрацоўнік гарадской паліклінікі № 4 г. Гродна Марына Юрга, сярод прафесіяналаў - Вольга Размыслова.

У намінацыі «Вакальная група» перамогу атрымала вакальная група Гродзенскага дзяржаўнага каледжа мастацтваў «Раскоша», у намінацыі «Дуэт - трыо» - дуэт гімназіі № 5 г. Гродна «Кансананс».

Спецыяльным прызам Гродзенскага гарадскога савета жанчын узнагароджана студэнтка факультэта мастацтваў і дызайну ГрДУ імя Янкі Купалы Вераніка Дашына. Таксама дзяўчына адзначана прызам Гродзенскай абласной арганізацыі ветэранаў.

Спецыяльны прыз ад ГА «Белая Русь» атрымаў квартэт ансамбля эстраднай песні «Надзея», ад ГА «БРСМ» - Аляксей Сіцько, ад Гродзенскай гарадской арганізацыі БТЧК - Анастасія Шкурова, ад Беларускага прафсаюза работнікаў навукі і адукацыі - дацэнт кафедры эканомікі і кіравання на прадпрыемстве ГрДУ імя Янкі Купалы Таццяна Гараева і яе дачка Анастасія.