Удзельнікамі мерапрыемства сталі выкладчыкі, аспіранты, магістранты і студэнты факультэта, зацікаўленыя ў абмене меркаваннямі, пошуку новых ведаў, знаходжанні агульных ідэй і рашэнняў. Запрошаныя эксперты - спецыялісты ў розных галінах ведаў - задалі тон дыскусіі.

Прафесар кафедры ўсеагульнай і славянскай гісторыі Валерый Чарапіца адзначыў ролю Кастрычніцкай рэвалюцыі ў сусветнай гісторыі, паказаў на рознае бачанне значнасці рэвалюцыйных пераўтварэнняў у мінулым і ў сучаснасці.

Пытанні іпастасі царквы ў жыцці грамадства таго часу, узаемаадносін царквы і рэвалюцыі, падзення духоўных каштоўнасцяў у паслярэвалюцыйных ўмовах закрануў мітрафорны протаіерэй Міхаіл Велісейчык, клірык прыходу прападобнамучаніка Серафіма Жыровіцкага ў Гродне.

Дацэнт кафедры беларускай філалогіі Руслан Казлоўскі засяродзіў увагу аўдыторыі на розных падыходах да адлюстравання рэвалюцыйных падзей 1917 года ў беларускай літаратуры, адзначыў уплыў рэвалюцыйных пераўтварэнняў на развіццё літаратурнага працэсу.

Уласны пункт гледжання на ролю асобы ў гісторыі прадставіў прафесар кафедры журналістыкі Аляксандр Мурашоў. Акрамя таго, Аляксандр Аляксандравіч падкрэсліў важнасць ўсебаковага вывучэння гістарычных фактаў і немагчымасць адназначнай ацэнкі мінулага.

Загадчык кафедры турызму і культурнай спадчыны Сяргей Данскіх закрануў праблемы захавання памяці аб рэвалюцыі 1917 года ў культурнай прасторы горада Гродна, прадставіў уласную думку наконт ідэі апелявання да савецкага мінулага пры развіцці турыстычнага патэнцыялу Беларусі.

Намеснік дэкана факультэта даўніверсітэцкай падрыхтоўкі Мікалай Мыслівец прэзентаваў вынікі сацыялагічнага даследавання, прысвечанага праблеме фарміравання гістарычнай свядомасці сучаснай студэнцкай моладзі, звярнуў увагу на пытанні захавання гістарычнай памяці аб рэвалюцыйных падзеях 1917 гады і стаўленне студэнтаў да гістарычнага мінулага.

Завяршылася сустрэча дыскусіяй. Яе мадэратарам выступіў старшы выкладчык кафедры гісторыі Беларусі, археалогіі і спецыяльных гістарычных дысцыплін Аляксандр Горны. Ён праводзіў паралелі паміж выступамі экспертаў, акцэнтаваў увагу на найбольш важных пытаннях, прыводзіў дадатковыя яркія і запамінальныя факты з гісторыі і літаратуры.

Да дыскусіі актыўна падключылася факультэцкая супольнасць. Прысутныя ў аўдыторыі апелявалі да дзейнасці Францыска Скарыны, Пятра I, Максіма Гарэцкага, Янкі Купалы, Освальда Шпэнглера, называлі прычыны Кастрычніцкай рэвалюцыі, тлумачылі яе эканамічныя, культурныя, ментальныя перадумовы, звярталі ўвагу на ідэю гістарычнай непазбежнасці рэвалюцыі, паказвалі на небяспеку супрацьпастаўлення класавых і агульначалавечых каштоўнасцяў, давалі шматлікія ацэнкі, агучвалі прапановы па захаванні гістарычнай памяці, неаднаразова падкрэслівалі важнасць вывучэння гісторыі і засвойвання яе ўрокаў.

З усімі навінамі факультэта гісторыі, камунікацыі і турызму можна азнаёміцца тут.