Першы ў краіне Інавацыйны медыйны кластар створаны ў Гродзенскай вобласці. Пагадненне аб яго стварэнні 2 сакавіка 2016 года падпісалі рэктар купалаўскага ўніверсітэта Андрэй Дзмітрыевіч Кароль, намеснік старшыні Гродзенскага аблвыканкама, дэпутат Палаты прадстаўнікоў Нацыянальнага сходу Рэспублікі Беларусь Віктар Андрэевіч Лісковіч, выконваючы абавязкі начальніка галоўнага ўпраўлення ідэалагічнай работы, культуры і па справах моладзі Гродзенскага абласнога выканаўчага камітэта Аляксандр Людвігавіч Вярсоцкі і галоўны рэдактар газеты «Гродзенская праўда» Павел Якаўлевіч Сухарукаў.Заснавальнікамі новай структуры сталі галоўнае ўпраўленне ідэалагічнай работы, культуры і па справах моладзі Гродзенскага абласнога выканаўчага камітэта, Гродзенскі дзяржаўны ўніверсітэт імя Янкі Купалы, рэдакцыя газеты «Гродзенская праўда» і Гродзенскае абласное аддзяленне ГА «Беларускі саюз журналістаў». Акрамя заснавальнікаў, у склад кластара ўвайшлі 17 рэдакцый раённых газет і тэлерадыёкампанія «Гродна».
Праца новай структуры будзе накіравана на інавацыйнае развіццё канкурэнтаздольнай інфармацыйнай прасторы Гродзенскай вобласці за кошт фарміравання эфектыўных механізмаў узаемадзеяння органаў дзяржаўнага кіравання, арганізацый адукацыі, навукі і вытворчасці.
Пагадненне прадугледжвае правядзенне шэрагу мерапрыемстваў па рэалізацыі сумеснай праектнай дзейнасці, павышэнню кваліфікацыі персаналу, навукова-даследчай і інавацыйнай рабоце, рэкламна-маркетынгавай дзейнасці і развіццю чалавечага патэнцыялу і карпаратыўнай культуры.