Пра гэта стала вядома падчас Усебеларускага злёту студэнцкіх атрадаў «Маладосць. Праца. Рамантыка», удзельнікамі якога сталі больш за 300 байцоў лепшых студэнцкіх атрадаў розных профіляў з усіх куткоў Беларусі, у тым ліку камандзіры і камісары, а таксама прадстаўнікі  арганізацый, кіраўнікі органаў дзяржаўнага кіравання.

Першы сакратар ЦК ГА «БРСМ», намеснік старшыні Пастаяннай камісіі Савета Рэспублікі па адукацыі, навуцы, культуры і сацыяльным развіцці Андрэй Белякоў упэўнены ў асноўнай каштоўнасці студатрадаўскага руху - самае галоўнае, што моладзь працуе.

– Сёння гэта пэўная школа, якая дае моладзі магчымасць зарабіць і, вядома ж, фарміруе гэтыя якасці. Вось што для нас важна, - падкрэсліў Андрэй Белякоў.

Цэнтральным мерапрыемствам злёту стала ўшанаванне пераможцаў рэспубліканскага конкурсу «Працоўны семестр - 2016» у Беларускім дзяржаўным маладзёжным тэатры.

Дыпломамі і каштоўнымі прызамі былі адзначаны лепшыя студэнцкія атрады, камандзіры і камісары, а таксама лепшыя арганізацыі, якія прымаюць студэнцкія атрады. Так, Гродзенскі абласны штаб прызналі лепшым абласным штабам сярод студэнцкіх атрадаў ГА «БРСМ». У яго складзе працавалі студэнты Гродзенскага дзяржаўнага ўніверсітэта імя Янкі Купалы: хлопцы працавалі на аб'ектах Усебеларускай і абласных моладзевых будоўлях у Астраўцы. Акрамя таго, купалаўцы - члены выязнога студэнцкага атрада «Дзеці Нёмана» - не адзін месяц працавалі ў дзіцячым санаторна-аздараўленчым комплексе «Жамчужына Расіі».

Другое месца сярод студэнцкіх атрадаў, якія працавалі на Усебеларускай маладзёжнай будоўлі, заняў наш студатрад імя Героя Савецкага Саюза В.М. Усава. Яго камандзірам з'яўляецца студэнт 5 курса інжынерна-будаўнічага факультэта Аляксей Ламашэвіч, а камісарам - таксама пяцікурснік гэтага факультэта Уладзіслаў Найдзюк.

Нарэшце, студэнцкі зводны вытворчы атрад «Беларусь», у складзе якога таксама былі купалаўцы, стаў лепшым сярод студэнцкіх вытворчых атрадаў.

Варта адзначыць, што студатрадаўскі рух - адно з вядучых напрамкаў дзейнасці ГА «БРСМ». У 2016 годзе сіламі ўсіх структурных падраздзяленняў Рэспубліканскага штаба студэнцкіх атрадаў працаўладкавана больш за 70 тысяч чалавек.

У трэцім працоўным семестры гэтага года студэнцкія атрады Беларускага рэспубліканскага саюза моладзі дапамагалі будаваць дзіцячую абласную клінічную бальніцу ў Гомелі, Цэнтральную раённую бальніцу ў Астраўцы, аперацыйны блок Магілёўскага абласнога анкалагічнага дыспансера з прыладай рэзервовай кацельні на прыродным газе. Студатрадаўцы ўдзельнічалі ў будаўніцтве трэцяй лініі Мінскага метрапалітэна, Кітайска-беларускага індустрыяльнага парку «Вялікі камень», а таксама збіралі ўраджай, працавалі з дзецьмі ў дзіцячых аздараўленчых лагерах, добраўпарадкоўвалі і акультурвалі тэрыторыі помнікаў воінскай славы, месцы масавых пахаванняў, тэрыторыі населеных пунктаў, месцы масавага адпачынку, водаахоўных зон і прыбярэжных палос водных аб'ектаў, паркаў, аб'ектаў культурна-гістарычнай і духоўнай спадчыны.