Удзельнікамі спаборніцтва сталі студэнты факультэта матэматыкі і інфарматыкі, факультэта фізічнай культуры, факультэта гісторыі, камунікацыі і турызму, факультэта псіхалогіі, факультэта біялогіі і экалогіі, інтэрната № 5 студгарадка і зборныя каманды ўніверсітэта.

Чэмпіянат праводзіўся ў два этапы. На завочным удзельнікам прапанавалі прайсці конкурс «Медыя Азбука» і музычны адборачны тур. Па яго выніках у фінал прайшлі 7 каманд для ўдзелу ў гульні на выбыванне. Сярод шасці каманд, якія не прайшлі ў вочны этап, арганізатары правялі міні-гульню «Куча мала», дзе «шчаслівы квіток» заваяваў прадстаўнік адной з каманд факультэта матэматыкі і інфарматыкі і такім чынам вывеў каманду ў фінал турніру.

У барацьбе за перамогу лепшай, на думку аргкамітэта спаборніцтваў, была прызнана каманда факультэта гісторыі, камунікацыі і турызму. Студэнты на высокім узроўні праявілі сваю эрудыцыю і знаходлівасць, паказалі глыбокія веды і першымі атрымалі пуцёўку ў фінал чэмпіянату, які адбудзецца ў канцы мая 2017 года. Таксама удзельнікі каманды у якасці прыза атрымалі сертыфікат на бясплатны ўдзел у квэсце «Пад замком».

–Астатнія ўдзельнікі фіналу вызначацца ў гульнях зімовай і вясновай серыі, - расказалі арганізатары Адкрытага чэмпіянату ўніверсітэта па інтэлектуальных гульнях. - Мы запрашаем новыя і ўжо сфарміраваныя каманды факультэтаў прыняць удзел у інтэлектуальным турніры.

Трэніроўкі для ўсіх жадаючых праходзяць кожную суботу ў 13.00 па адрасе: вул. Леніна, 32 аўд. 3.